హైదరాబాద్ డ్ర*గ్ మాఫియా : టెకీ సహా పెద్ద పెద్ద వాళ్లే చిక్కారు

పట్టుబడిన వారందరికీ మత్తు పరీక్షలు నిర్వహించగా అందరూ డ్ర*గ్స్ తీసుకున్నట్లు నిర్ధారణ అయ్యింది.

HYDERABAD:హైదరాబాద్ ఐటీ కారిడార్ మరోసారి సంచలన వార్తలతో నిండిపోయింది. గచ్చిబౌలి ప్రాంతంలో, తెలంగాణ నార్కోటిక్స్ విభాగం – ఈగల్ టీమ్ నిర్వహించిన దాడుల్లో డ్ర*గ్స్ కొనుగోలుకు వచ్చిన 14 మంది యువకులు పట్టుబడటం కలకలం రేపుతోంది. ఈ ఘటన యువత డ్ర*గ్స్ ఉచ్చులో ఎలా చిక్కుకుపోతుందో మరోసారి కళ్లకు కట్టింది. పట్టుబడిన వారిలో నలుగురు ఐటీ ఉద్యోగులు, ఒక విద్యార్థి, ఒక ప్రాపర్టీ మేనేజర్, ఒక ట్రావెల్ ఏజెన్సీ యజమాని ఉన్నారు. వీరంతా 20-30 ఏళ్ల మధ్య వయస్సు వారే కావడం, చదువుకున్న వారు, ఉద్యోగుల్లోనూ మాదక ద్రవ్యాల ప్రభావం పెరుగుతుండటం తీవ్ర ఆందోళన కలిగిస్తోంది.

నాలుగేళ్ల చిన్నారితో డ్ర*గ్స్ కొనుగోలుకు వచ్చిన దంపతులు!

మరింత బాధాకరమైన విషయం ఏంటంటే.. పట్టుబడిన 14 మందిలో ఒక దంపతులు ఏకంగా తమ నాలుగేళ్ల చిన్నారితో కలిసి గంజాయి కొనుగోలు చేసేందుకు వచ్చారు. మరో జంటకు కూడా డ్ర*గ్స్ పరీక్షల్లో పాజిటివ్ వచ్చిందని సమాచారం. పట్టుబడిన వారందరికీ పోలీసులు డ్ర*గ్ పరీక్షలు నిర్వహించి, అనంతరం డీ-అడిక్షన్ సెంటర్లకు తరలించారు. ఈ సంఘటన యువత, కుటుంబాలపై డ్ర*గ్స్ ప్రభావం ఎంత తీవ్రంగా ఉందో స్పష్టం చేస్తోంది. ఈగల్ టీమ్ దర్యాప్తులో అత్యంత కీలకమైన అంశం ఏమిటంటే, మహారాష్ట్రకు చెందిన డ్ర*గ్ పెడ్లర్ సందీప్‌ను ఇటీవల అరెస్టు చేశారు. అతని మొబైల్‌లో గంజాయి కొనుగోలు చేసే వారి ఫోన్ నంబర్లు లభ్యమయ్యాయి. ఈ సమాచారం ఆధారంగా ఈగల్ టీమ్ ఒక డికాయ్ ఆపరేషన్ నిర్వహించింది. “భాయ్ బచ్చా ఆగయా భాయ్” అనే కోడ్ మెసేజ్‌ని వాట్సాప్ ద్వారా పంపి, కేవలం రెండు గంటల్లోనే హెచ్‌డీఎఫ్‌సీ బ్యాంక్ సమీపంలో 14 మందిని పట్టుకున్నారు.

-అందరికీ డీ-అడిక్షన్ సెంటర్లే శరణ్యం

పట్టుబడిన వారందరికీ మత్తు పరీక్షలు నిర్వహించగా అందరూ డ్ర*గ్స్ తీసుకున్నట్లు నిర్ధారణ అయ్యింది. దీంతో వారిని వెంటనే డీ-అడిక్షన్ సెంటర్లకు తరలించారు. ఈ చర్య యువతను మాదక ద్రవ్యాల బారి నుంచి కాపాడటానికి ప్రభుత్వ నిబద్ధతను తెలియజేస్తుంది.

-ఒక వారంలో రెండో భారీ ఆపరేషన్: మల్నాడు రెస్టారెంట్ రాకెట్! 

ఈగల్ టీమ్ ఇదే వారంలో జూలై 7న మరో భారీ డ్రగ్ ముఠాను పట్టుకుంది. కోంపల్లిలోని మల్నాడు రెస్టారెంట్ యజమాని సూర్య అన్నమనేని సహా ఆరుగురిని అరెస్టు చేశారు. ఈ ముఠా ద్వారా కొకైన్, ఎక్స్టసీ పిల్స్, OG వీడ్ వంటి ప్రమాదకరమైన డ్ర*గ్స్ సరఫరా అవుతున్నట్లు వెల్లడైంది. ఈ రెండు ఆపరేషన్లు డ్రగ్స్ రవాణా, వినియోగం ఎంత విస్తృతంగా ఉందో తెలియజేస్తున్నాయి.

డిజిటల్ లావాదేవీలు.. అంతర్జాతీయ డ్రగ్ నెట్‌వర్క్! 

ఈ డ్ర*గ్స్ వ్యవహారంలో ఇంకా 19 మంది పరారీలో ఉన్నారని పోలీసులు తెలిపారు. వారిలో టెకీలు, డాక్టర్లు, ఫైవ్ స్టార్ పబ్ యజమానులు, రియల్ ఎస్టేట్, ఫుడ్ & బివరేజెస్ రంగాలకు చెందిన వ్యక్తులు ఉన్నట్లు సమాచారం. ఈగల్ టీమ్ వెల్లడించిన దాని ప్రకారం, ఈ మొత్తం వ్యవహారంలో అంతర్జాతీయ స్థాయిలో డ్ర*గ్ సరఫరా, డిజిటల్ ఫైనాన్స్ లావాదేవీలు, పబ్-బేస్డ్ వినియోగదారుల నెట్‌వర్క్ ముడిపడి ఉన్నాయి.

తెలంగాణ ప్రభుత్వం ప్రత్యేకంగా ప్రారంభించిన ఈగల్ బృందం వరుస విజయాలతో మాదక ద్రవ్యాల వ్యసనానికి అడ్డుకట్ట వేస్తుండటం ప్రశంసనీయం. అయితే, యువత డ్ర*గ్స్ మత్తుకు అలవాటుపడటం, కుటుంబాలతో సహా వచ్చి కొనుగోలు చేయడం వంటి ఘటనలు సమాజంలో ప్రమాద ఘంటికలు మోగిస్తున్నాయి. ముఖ్యంగా సాంకేతిక రంగంలో ఉన్నవారే ఈ మార్గంలో పడిపోతే భవిష్యత్ తరాలపై తీవ్ర ప్రభావం చూపే ప్రమాదం ఉంది. ఈ పరిస్థితుల దృష్ట్యా, అధికారులు మరింత కఠినంగా పర్యవేక్షణ చేసి, డ్ర*గ్స్ వ్యతిరేక అవగాహన కార్యక్రమాలను విస్తృతంగా నిర్వహించాల్సిన అవసరం ఉందని నిపుణులు సూచిస్తున్నారు. యువతను ఈ వ్యసనం నుంచి కాపాడటానికి సమాజం, ప్రభుత్వం కలిసికట్టుగా పనిచేయాలి.